بعد الجولة لي دارتها فبيروت واسطنبول ومدن أخرى، غتوصل سفينة "Rainbow Warrior" ديال منظمة "Greenpeace"، غدا الجمعة، لميناء طنجة ومن المنتظر تستقبل المواطنين باش يكتشفوها.
هاد السفينة، لي كتجي بمناسبة انعقاد المؤتمر العالمي للمناخ COP22 فمراكش، غتفتح أبوابها نهار السبت والاحد فطنجة، باش يتعرفو عليها المواطنين وعىلى المميزات ديالها، بهدف الترويج للطاقة الشمسية كحل رئيسي لحل أزمة التغيرات المناخية.
وخلال هاد النهار، غتنظم مجموعة من الأنشطة، منها فن الطبخ على الطاقة الشمسية، وزاوية خاصة بالأطفال فيها الرسم عى الوجه، بالإضافة لعرض موسيقي غيقدمو الشاب ياسينو وفرقة لانسوميز.
جولة "الشمس تجمعنا" لسفينة Rainbow Warrior
وكتزور سفينة "Rainbow Warrior" المغرب لأول مرة، فإطار جولة "الشمس تجمعنا" باش تلتقي بالمواطنين ديال منطقة الشرق الأوسط وشمال إفريقيا، وتوصّل رسائلهم لصناع القرار وتضغط عليهم باش يتخدو قرارات باش يخليو العالم يعتمد بنسبة 100% على الطاقة المتجددة.
ومن خلال هاد المبادرة، بغات منظمة Greenpeace توصّل فكرة أن مستقبل المنطقة مرتبط بالشمس وبالاستفادة منها، وباللي الطاقة الشمسية بإمكانها تساهم فبناء مستقبل أكثر استقرار للشعوب ديالها.