COP22 تعلن شراكتها الرسمية للـ Formule E

COP22 تعلن شراكتها الرسمية للـ Formule E

لأول مرة فإفريقيا، غتنظّم مسابقة للسيارات الكهربائية  Formule E، من طرف الاتحاد الدولي للسيارات FIA، نهار 12 نوفمبر فمراكش، على هامش أشغال المؤتمر العالمي للمناخ COP22.

وحسب البلاغ اللي توصلنا بيه، قال Alejandro Agag، المدير العام للـFormule E، "التجربة الأولى ديال هاد السباق فالقارة الإفريقية، كيثبت فعلا باللي حنا حققنا بطولة "عالمية".

 واعتبر Alejandro باللي التواجد ديالهم فمراكش، كشركاء رسميين للـCOP22، "كيجي بسبب تفهمنا للتحديات والأخطار اللي كتسبب فيهم التغيرات المناخية، وبما أننا حاضرين فهاد الملتقى العالمي هدا شرف كبير".

أما Jean Todt، مدير FIA ، قال باللي Formule E هي مثال جيّد لبطولة ديال FIA، بحيت من المهام ديال FIA هو ترويج أنظمة التنقل النظيفة المتاحة للجميع، والبحث على تشجيع تطوير التقنيات المستدامة.

وغيتنافسوا المتسابقين ديال Formule E، فحلبة مولاي الحسن، اللي كتبلغ المسافة ديالو 2.97 كيلومتر، وسبقلها احتضنت WTCC، بحيت غتكون المرحلة الثانية من هاد السباق اللي وصل للعام التالت ديالو، واللي كيتكوّن من 10 مراحل، بحال: باريس، نيويورك، بروكسيل، برلين، بوينوس آيرس وهونغ كونغ وغيرها.